De Badmötse zeen opgerich in 2009. Live meziek mit de vastelaovend, dat is nog altied ’t sjoonste dat d’r is. Kinne swinge op meziek gesjpeeld door ein live band!
’t Idee hong al sinds 2008 in de loch. En naodat Geert en Lynyrd eine keer op de bühn sjtonge biej ZaalAcht in Remunj en dao mitsjpeelde mit De Wauze waerde ’t tied veur serieuze sjtappe. Ein repertoire waerde vasgelag en de muzikante waerde biejein gezoch. ’t Jaor d’rop stonge de Badmötse veur ’t eers op ’t podium.
De formule bleek te wirke want ’t jaor d’rnao waerde de leedjesaovend van D’n Uul in Remunj gewonne door Keup. Ondanks dat Keup die optraejes allein deej, goof dit de band natuurlik aug eine impuls. Vanoet alle heuk van Limburg wis men de Badmötse te vinje.
Langzaamaan greujde de band nao grotere optraejes haer. In 2013 sloete de Badmötse ’t LVK aaf en later dat jaor staon ze op de Vriethaof in Mestreech. Veur ’t eers waerd aug gedach aan eige leedjes die de 11de van de 11de geprizzenteerd waere.